كتبت دارين أبو جامع على حسابها الشخصي على موقع فيسبوك:

يا خي اغبى سؤال ليش مانزحتو !

هو النزوح سهل ؟ انتو عارفين شو يعني نزوح اصلا ؟؟ عارف كيف بنتبهدل وبتنقل قيمتنا ؟ كيف بنجري للتهلكة وشعور القهر اللي بنحسه ؟

عارف شو يعني تختار شو أهم المهم وتاخده معك ؟ فرشة ومخدة وبطانية وبتجري فيهم ع ضهرك ؟ ناس بتنام بالشارع بالأيام عبال تلافي مكان تنصب فيه خيمتك ويمكن المكان يكون بالأجار ؟ طب بتعرف قديش هتمشي وانت حامل ع ضهرك عفشك ولا قديش هتدفع للسيارة اللي هتنقلك قي حال لقيت سيارة ؟ طب قديش هتكلف الخيمة واذا مافي خيمة قديش بدك خشب وشوادر ؟ وتقعد تلف ع الناس عشان تلاقي مكان تفوت فيه الحمام وقديش بدك عشان تقدر تعمل حمام الك ولعيلتك !!

نزوح وهروب وتوتر طول الوقت مافي مكان آمن والحياة صارت تضيق علينا من كل النواحي ، يمكن لأن اثنين مليون شخص نهرب معاً ونعاني معاً توزعت هذه المأساة علينا جميعاً ومابعرف كيف بنتحمل كل اللي بصير لهاي اللحظة ، ملابسي وجسمي أصبحت خريطة بالجروح ولسعات النار ،

الكثير الكثير من الوجع لوقت لاادري كيف حتى يمكنني تذكره وسرده