كتبت آلاء سعيد مشعل على حسابها الشخصي على موقع فيسبوك:

جروبنا مستحيل يكون ناقص واحد!
هتخلص الحرب ونرجع نلتقي ونميل عليه ناخذه معنا بالسيارة، هتخلص وهنرجع ويعزمنا على بيتزا خالتو آمال،
حكتلنا مرة "امي احسن حد يعمل بيتزا وهيجي يوم واعزمكم"
لسا ما اجا هااليوم وهيجي اكيد بعد الحرب، مستحيل تكون انت و خالتو رحتو قبل ما تعزمنا،
مين هيحكي قصص نجاحنا للدفعات الجاية؟ مين هيحكيلهم كيف يصيرو مصممين محترفين بالفوتوشوب ؟ وكيف يصنعو معرض اعمال قوي؟ مين هيحكيلهم كيف اخذت اول وظيفة وكيف كملت وشو عملت! مين هيحكي عن تجاربك في عالم العمل الحر؟ لمين هنروح لما نتورط بالشغل؟
مستحيل يا محمد ما تكون بينا، مستحيل تروح بدون ما تحكي كل اشي!
بدري يا محمد كثير بدري غيابك هادا ما حدا بستوعبه،
وما حدا مسدق انك رحت!
الكل بحكي " راح اشلاء"
ومش فاهمه كيف يعني؟
لسا شايفة صورتك باخر مرة اجتمعنا فيها، قاعد قدام اللابتوب وحاطط السماعات وبتشتغل،
شايفة صورتنا كلنا متجمعين وبنتفق شو بدنا نطلب فطور،
لسا سامعه صوتك وانت بتقول تميس تاني!!!
مش هنجيب تميس بس ارجع واحكي انه اللي صار كزبة!
او احكيلي اني بكابوس
وهالحرب كلها كابوس اسود! 

 

توضيح:

كتبت آلاء سعيد هذا النص عن الشهيد "محمد أبو قاسم" الذي استشهد مع والدته وشقيقتيه هيا وأروى في قصف إسرائيلي استهدف منزلهم في دير البلح بتاريخ 12 يناير 2024، ثم لحق به شقيقه عمرو متأثرًا بإصابته البليغة بتاريخ 29 يناير 2024.